U certifikua gjenerata e parë e kursit të IT, Dizajnit Grafik dhe Ndërmarrësisë
U certifikua gjenerata e parë e kursit të IT, Dizajnit Grafik dhe Ndërmarrësisë në Organizatën “LIZA-R” në Gjilan, një ngjarje e rëndësishme që shënon një hap të madh për avancimin e aftësive profesionale dhe zhvillimin e mundësive për të rinjtë.
Në një ceremoni të veçantë, Kryetari i Organizatës “LIZA-R”, z. Ujmir Krasniqi, së bashku me stafin e tij, uroi me emocione të gjithë ata që përfunduan me sukses këtë kurs.
Ai theksoi se ky ishte vetëm fillimi i një rrugëtimi të gjatë dhe të suksesshëm për pjesëmarrësit, duke i inkurajuar ata që të vazhdojnë të investojnë në zhvillimin e aftësive të tyre dhe të shfrytëzojnë mundësitë që i ofron ky treg dinamik dhe në rritje.
Ai përmendi se investimi në edukimin dhe aftësitë e rinisë është një nga prioritetet kryesore të organizatës dhe se ky kurs është një hap i rëndësishëm drejt një të ardhmeje më të mirë për të rinjtë.Pjesëmarrësit e këtij kursi u shprehën të kënaqur me përvojën që morën dhe me njohuritë që u mundësuan për të përmirësuar aftësitë e tyre profesionale.
Ata shprehën falënderime të sinqerta për mundësinë që u dha për të mësuar nga ekspertë të fushave përkatëse dhe për mbështetjen e madhe që morën gjatë gjithë periudhës së trajnimit.
Ky sukses i parë është një hap i madh përpara për “LIZA-R”, i cili synon të vazhdojë të ofrojë mundësi edukimi dhe trajnimi për të rinjtë dhe profesionistët në fushat e teknologjisë, dizajnit grafik dhe ndërmarrësisë.
Ky Kurs dhurohet falas nga Organizata “LIZA-R” për të rinjtë e regjionit të Anamoravës dhe mbështetet nga TIKA Turke dhe YTB.
